Резултатите од претседателските избори, од 80 отсто обработени податоци, покажуваат дека за Кемал Киличдароглу гласале 757 лица или 51,81 отсто од гласачите, додека за реизбор на актуелниот претседател Реџеп Таип Ердоган гласале 569 или 38,95 отсто од гласачите
Вкупно 4 107 лица во Скопје во Амбасадата на Р Турција излегле да го дадат својот глас на претседателските и парламентарните избори кои се одржаа вчера во Турција. Според објавените резултати, од досега преброените гласови, може да се види дека лидерот на опозицијата Кемал Киличдароглу води на изборите во Македонија.
Резултатите од претседателските избори, од 80 отсто обработени податоци, покажуваат дека за Кемал Киличдароглу гласале 757 лица или 51,81 отсто од гласачите, додека за реизбор актуелниот претседател Реџеп Таип Ердоган гласале 569 или 38,95 отсто од гласачите. Националистичкиот кандидат Синан Оган освоил 90 гласа или 6,16 отсто од гласовите, а Мухарем Инче 45 гласа 3,08 отсто од гласовите.
На парламентарните избори, од 60 отсто обработени податоци, во водство е Републиканска народна партија (ЦХП) предводена од Киличдароглу со 365 гласа или 31,71 отсто од гласовите, наспроти Партијата на правдата и развојот (АКП) на Ердоган која освоила 349 гласа или 30,31 отсто од гласовите.
Турција оди во вториот круг на изборите откако претседателот Реџеп Таип Ердоган на изборите вчера оствари значителна предност пред својот ривал, но недоволна за потребното мнозинство.
Ниту Ердоган ниту кандидатот на опозицијата Кемал Киличдароглу не добија 50 отсто и повторно ќе се соочат на 28 мај.
По преброените 97 отсто од гласачките ливчиња, Ердоган води со 49,39 отсто, а Киличдароглу има 44,92 отсто, јави државната новинска агенција Анадолу. Државната изборна комисија објави дека 49,49 отсто од гласачите гласале за Ердоган по преброените 91,93 отсто од гласачките ливчиња.
Третиот, националистичкиот кандидат Синан Оган, освои 5,3 отсто од гласовите и може да го одлучи победникот, во зависност од тоа кого ќе поддржи во вториот круг.
На парламентарните избори одржани паралелно со претседателските избори Народната алијанса, составена од исламистичката партија на Ердоган АКП, националистичката МХП и други, постигна подобар од очекуваниот резултат и е на добар пат да добие мнозинство. По пребројувањето на 93 отсто од гласачките ливчиња, се очекува тој да има 324 од вкупно 600 мандати.
Националната алијанса на Киличдароглу од шест опозициски партии, вклучително и секуларната Републиканска народна партија (ЦХП), основана од Ататурк, освои 211 места.
Алијансата за труд и слобода, предводена од прокурдската Зелено-левичарска партија, според сегашните податоци, ќе има 65 места во парламентот.
ИЗВОР: 360stepeni.mk
