ИСТАНБУЛ (АА) – Северна Кореја пратила околу 3.500 дополнителни војници во Русија на обука, со можност за трета рунда распоредување војници, изјави денес јужнокорејскиот пратеник што неодамна ја посетил Украина, јавува Анадолу.
Пратеникот Ју Јонг-веон од владејачката партија Народна сила во Јужна Кореја се повика на разузнавачките информации што ги добил од шефот на украинската воена разузнавачка служба, генерал-потполковник Кирило Буданов, за време на неговата посета на Украина минатиот месец, пренесе Јонхап њуз од Сеул.
Според него, околу 3.500 севернокорејски војници се наоѓаат на обука за адаптација на теренот на пет локации во рускиот Далечен Исток, а постои можност за трето распоредување.
„Втората група севернокорејски војници брои околу 1.500 луѓе и веќе се распоредени во близина на руската област Курск по завршувањето на обуката“, изјави Ју претходно во денешното интервју за радио ЦБС.
„Од украинската Влада добив информации дека се праќаат дополнителни војници за да се дополни постојната сила и дека друга група е во фаза на подготовка за распоредување“, додаде тој.
Ју, исто така, истакна дека Украина проценува дека досега загинале околу 4.000 севернокорејски војници.
Во јануари, јужнокорејската Национална разузнавачка служба тврдеше дека најмалку 300 севернокорејски војници биле убиени, а 2.700 ранети во борбите против Украина.
Во октомври минатата година Пентагон објави дека Северна Кореја пратила околу 10.000 војници во Источна Русија.
Пјонгјанг досега молчеше и не ги коментираше извештаите за наводните загуби и жртви меѓу неговите војници во Русија.
Извор: Anadolu Agency (AA)
