СЕУЛ (АА) – Вооружените сили на Јужна Кореја и САД започнаа денес заедничка воена вежба, а северокорејскиот лидер Ким Јонг-ун ја посети поморската единица каде го следеше тестот на крстосувачки ракети лансирани од воен брод, пренесува Анадолу.
Станува збор за 11-дневна годишна вежба „Улчи фридом шилд“ (UFS) на Јужна Кореја и американската војска.
„Вежбата е заснована врз сеопфатно воено сценарио… Има за цел јакнење на заедничката подготвеност среде засилени тензии поради ракетните тестирања од страна на Северна Кореја и поострата реторика против сојузниците“, објави агенцијата Јонхап со седиште во Сеул.
Вежбата вклучува вежби на командното место засновано на компјутерска симулација, истовремена обука на терен и вежба на цивилната одбрана Улчи.
Јужнокорејските воздухопловни сили исто така одржаа вежба за противвоздушна одбрана на 12 места низ земјата.
Паралелно со ова, агенцијата КЦНА (Корејската централна новинска агенција) со седиште во Пјонгјанг објави дека лидерот на Северна Кореја, Ким Јонг-ун, ја посетил поморската флота која има за задача да го брани источниот брег. Во веста не е прецизиран датумот кога се случила посетата.
„Ким ја замоли поморската единица да даде пример во подготовката за борба и секогаш да преземе водство во јакнењето на морнарицата“, наведуваат од Пјонгјанг.
Севернокорејскиот лидер присуствувал и на вежбата во која морнари на патролен брод изведоа лансирање на стратешки крстосувачки проектили.
