Зајакнување на партнерството меѓу безбедносните служби на Македонија и Австрија е целта на дводневната посета на директорот на Бирото за јавна безбедност, Александар Јанев на австриската полиција во Виена.
Во рамки на посетата, Јанев оствари средба со генералниот директор за јавна безбедност Франц Руф, како и со директорот на федералната криминалистичка полиција, генерал Андреас Хотцлер.
-Разговаравме за унапредување на билатералната соработка, размена на информации, справување со илегална миграција, прекуграничен криминал, гранична контрола и искуствата од заедничките патроли со соседните земји, вклучително и Фронтекс мисијата во Македонија. Посебен фокус ставивме и на борбата против тероризам, радикализам, како и модели на полициско работење во заедницата. Дополнително, отворивме и повеќе конкретни случаи од взаемен интерес и можности за идни заеднички операции во делот на сузбивање на транснационален криминал. Задоволството и довербата во соработката меѓу двете полиции беа јасно нагласени од двете страни, вели директорот на БЈБ.
За време на посетата планирано е Јанев да оствари и средби со раководителите на Канцеларијата за заеднички операции против криумчарење на мигранти и трговија со луѓе, Оперативниот команден центар во Виена, Контролниот центар за сообраќај, како и со раководството на аеродромот во Виена.
Извор: kurir.mk
