Во просториите на Министерството за информатичко општество и администрација (МИОА) денеска се изврши примопредавање на должноста помеѓу досегашниот министер Адмирим Алити и новоименуваниот министер Азир Алиу.
Како што информираат од МИОА, во срдечна атмосфера, двајцата си посакале многу успех и ефикасно справување со предизвиците кои претстојат во ресорот.
Новиот министер Алиу истакна дека силно верува оти со многу работа, упорност и одговорност, може да се постигнат резултати со кои ќе бидат горди сите наши сограѓани
-Моите претходници започнаа некои навистина значајни процеси и проекти во областите како што се дигитализација, сајбер безбедност и развој на информациски и комуникациски технологии, кои заедно со новите проекти што ги подготвуваме со мојот тим, очекуваме значајно да влијаат на подобрување и позитивна трансформација на целокупниот ИКТ еко-систем во Република Северна Македонија. Силно верувам дека со многу работа, упорност и одговорност, можеме да постигнеме резултати со кои ќе бидат горди сите наши сограѓани, рече Алиу.
Алиу е интернационален експерт во областа на информатичките технологии и образованието, со повеќе од 20 години работно искуство во приватниот и академскиот сектор, реализирајќи над 100 различни проекти во области како дигитална трансформација, развој на стартап екосистеми, вештачка интелигенција и машинско учење.
На должноста министер доаѓа од позиција на универзитетски професор на Универзитетот на Југоисточна Европа во Тетово на факултетот за Компјутерски науки и технологија.
ИЗВОР: kurir.mk
