Во случај на голем земјотрес во Романија со јачина од 7,4 – 8,1 степени според Рихтеровата скала, повеќе од 350.000 станбени згради ќе бидат сериозно оштетени, а бројот на тешко повредени или загинати луѓе ќе надмине 45.000. Ова се наведува во извештајот од страна на Генералниот инспекторат за вонредни ситуации на МВР со наслов „Национален концепт за пост-сеизмички одговор“, пренесе БТА.
Најмногу ќе настрада округот Бузау, а потоа следуваат Прахова, Галаци, Букурешт и Вранча со 39.000, 37.000, 35.000 и 33.000 оштетени згради. Податоците кореспондираат со проценката од крајот на 2021 година, но во јануари 2022 година ревизијата на Комората за ревизија покажува дека ситуацијата е многу полоша, јавија романски медиуми.
Третина од болниците во Букурешт, или 36 отсто, може да бидат сериозно оштетени од силен земјотрес, покажуваат податоците. Од 55 медицински установи во главниот град на Романија, 20 се изложени на сеизмички ризик додека 12 болници се класифицирани со највисок степен на сеизмичка опасност.
Податоците од извештајот покажуваат и дека од вкупниот број засолништа за цивилна заштита – 1.106 (јавни и приватни) со капацитет од 171.805 лица – функционираат само 60 отсто. Не постои национална банка за крв на национално ниво. Министерството за здравство има ограничени залихи на лекови, санитарни материјали и опрема потребни за давање итна медицинска помош.
ИЗВОР: kurir.mk
