ЕРУСАЛИМ / ИСТАНБУЛ (АА) – Двесте израелски воени лекари потпишаа петиција со која бараат итно враќање на заложниците од Газа, дури и ако тоа значи завршување на војната во палестинската енклава, објави израелскиот „Канал 13“, јавува Анадолу.
„Ние, резервните лекари во различни единици на израелската Армија, бараме итно враќање на заробените и прекин на борбите во Појасот Газа“, се наведува во петицијата.
Петицијата го отсликува растечкото незадоволство меѓу израелските воени редови, при што лекарите потенцираат дека војната одамна ги надминала своите првични цели.
„По повеќе од 550 дена борби, кои веќе го чинеа Израел скапо, со болка чувствуваме дека продолжувањето на војната во Газа главно служи за политички и лични интереси, без реална безбедносна цел“, велат лекарите во петицијата.
Досега околу 40 заложници се убиени за време на копнените операции. „Како медицински офицери, ние служиме во резервниот состав од обврска кон светоста на животот. Предупредуваме дека продолжувањето на борбите и напуштањето на заробените е спротивно на овие вредности“, се додава во петицијата.
Оваа петиција е дел од поширокиот бран јавни апели од активни и поранешни припадници на израелската Армија, кои бараат враќањето на заложниците да стане приоритет, дури и по цена на завршување на војната.
Од четвртокот наваму, според бројките на Анадолу, најмалку шест вакви петиции циркулираат во јавноста. Првата ја потпишале 1.000 резервисти од израелското воздухопловство, а подоцна ја поддржале и околу 1.000 академици.
Слични апели упатиле и припадниците на оклопните единици, морнарицата и елитните воени единици како што се Единицата 8200, Баталјонот 13 од Падобранската бригада, Шалдаг, Сајерет Маткал и Моран.
Израелскиот премиер Бенјамин Нетанјаху реагираше со закана дека ќе ги отпушти војниците на должност кои ќе потпишат вакви петиции.
Израелската Армија ги обнови нападите врз Газа на 18 март, со што го прекрши прекинот на огнот и договорот за размена на заробеници постигнат на 19 јануари.
Од октомври 2023 година досега, во израелската офанзива врз Газа се убиени речиси 51.000 Палестинци, од кои најголем дел се жени и деца.
Минатиот ноември, Меѓународниот кривичен суд издаде налог за апсење на израелскиот премиер Бенјамин Нетанјаху и поранешниот министер за одбрана Јоав Галант, под обвинение за воени злосторства и злосторства против човештвото во Газа.
Покрај тоа, Израел се соочува и со тужба за геноцид пред Меѓународниот суд на правдата поради војната против палестинската енклава.
Извор: Anadolu Agency (AA)
