Израелските сили извршија напад во близина на градот Наблус, што се наоѓа во северниот дел на окупираниот Западен Брег, при што животот го загубија тројца Палестинци, пренесува Анадолу.
„Генералниот совет за цивилни работи (при Палестинската ослободителна организација) ни пренесе дека тројца Палестинци го загубиле својот живот како резултат на отворениот оган од страна на окупаторите во близина на Наблус“, се вели во соопштението на палестинското Министерство за здравство.
Во веста на палестинската државна телевизија се нагласува дека израелската војска нишанела кон возило на Палестинците на воената контролна точка во близина на Наблус. Во веста не се дадени повеќе детали.
Меѓу другото, портпаролот на израелската војска, Авичај Адрае, изјави дека во „вооружениот судир“ во Наблус се убиени тројца Палестинци, и дека едно лице е приведено. Според него, во случајот нема повредени израелски војници.
– Масакрот на израелската војска во Наблус
Израелските сили на 22 февруари извршија рации во повеќе зони во Наблус, што се наоѓа во северниот дел на окупираниот Западен Брег.
Израелските војници опколија една куќа во историската зона Стар град во Наблус, и со вистински куршуми интервенираа врз Палестинците кои протестираа против рацијата. Во нападот загинаа 11 Палестинци, меѓу кои и едно дете и две постари лица, додека над 100 Палестинци беа повредени, од кои шест беа тешко повредени.
Инаку, 84 Палестинци, меѓу кои деца и жени, загинаа во нападите на израелската војска и еврејските доселеници извршени од почетокот на годината досега во границите на окупираниот Западен Брег.
Извор: www.aa.com.tr
