ИСТАНБУЛ (АА) – Претседателот на Израел, Исак Херцог, ја опиша ситуацијата во земјата како „многу сериозна“ поради планот на Владата да спроведе судски реформи, кои опозицијата ги смета за обид да се намалат овластувањата на судската власт во корист на извршната, известува Анадолу.
„Ние сме во многу сериозна ситуација која може да има политички, економски, социјални и безбедносни последици“, рече претседателот Херцог за време на една свеченост во Тел Авив, пренесе весникот „Тајмс оф Израел“.
Претседателот на Израел напомена дека сето свое време и енергија ги посветил кон изнаоѓање на разбирање кое ќе ја спаси земјата од уставна и социјална криза.
Херцог потврди дека се состанува со претставниците на владината коалиција и опозицијата.
„Ова не е политички компромис, ова е Сизифов напор да се изнајде правилна формула на рамнотежа и надеж, бидејќи ситуацијата е многу тешка и загрижувачка“, предупреди израелскиот претседател.
Неговите напори за посредување меѓу владината коалиција и опозицијата сѐ уште не дадоа значителен напредок.
Зборувајќи на церемонијата, Естер Хаут, шефицата на Врховниот суд, изрази загриженост поради владиниот потег, за кој рече дека би го поткопал „израелското единство“.
Во последните два месеца, илјадници Израелци излегоа на улица во знак на протест против планот на Владата на премиерот Бенјамин Нетанјаху во врска со реформите во судството.
Реформите, што ги предложи министерот за правда Јарив Левин, претставуваа најрадикална измена некогаш спроведена во системот на власта во Израел.
Предложената реформа би ги ограничила овластувањата на Врховниот суд за правда, би ѝ овозможила на Владата да бира судии и да го финализира именувањето на правните советници во Министерството од страна на државниот обвинител.
Меѓутоа, Нетанјаху, на кого му се суди за корупција, тврди дека неговиот план за реформи во судството би ја унапредил демократијата во Израел.
Извор: www.aa.com.tr
