АЛ-КУДС (ЕРУСАЛИМ) – Израелскиот парламент (Кнесет) синоќа го одобри предлог-законот со кој се предвидува прекин на активностите на Агенцијата на Обединетите нации (ОН) за палестински бегалци на Блискиот Исток (УНРВА) во Израел, известува Анадолу.
За време на гласањето во Кнесетот, вкупно 92 од 120 пратеници гласаа за предлог-законот за забрана на активностите на УНРВА во Израел, а десет гласаа против.
Израелската армија уби 231 припадник на персоналот на УНРВА во нападите врз Појасот Газа од 7 октомври 2023 година.
Израелската Влада започна кампања со клевети против УНРВА во исто време со започнувањето на бомбардирањата и гранатирањата врз Појасот Газа на 7 октомври 2023 година, тврдејќи дека агенцијата треба да се затвори со изговор дека наводно 14 вработени на УНРВА, во која има 12.000 вработени само во Газа, „учествувале во нападите на 7 октомври“.
Прекршувајќи ја резолуцијата на Советот за безбедност на Обединетите нации (СБОН) со која се бара итен прекин на огнот Израел ја продолжи својата брутална офанзива врз Појасот Газа од октомври минатата година.
Локалните здравствени власти соопштија дека оттогаш во израелските напади се убиени повеќе од 43.000 Палестинци, главно жени и деца, а над 101.100 се ранети.
Израелските напади го раселија речиси целото население на територијата на Појасот Газа, а блокадата доведе до недостиг на храна, чиста вода и лекови.
Израел е обвинет за геноцид пред Меѓународниот суд на правдата поради неговите постапки во Газа.
Извор: Anadolu Agency (AA)
