ЕРУСАЛИМ/КУДС (АА) – Израелската армија денес соопшти дека од почетокот на конфликтот во Газа на 7 октомври загинале 425 израелски војници, пренесува Анадолу.
Во соопштението на војската се вели дека од 425 војници, 97 се загинати откако Израел ја прошири копнената офанзива во опколената палестинска енклава на 27 октомври.
Според соопштението, повредени се 1.593 војници, од кои 559 војници ранети во копнената операција во Газа.
Војската го објави соопштението по еден ден откако весникот Једиот Ахронот вчера објави дека над 5.000 војници се повредени во Газа од почетокот на последниот конфликт, а од страна на Министерството за одбрана официјално како „онеспособени“ се наведени над 2.000.
Израел ја продолжи својата воена офанзива на Појасот Газа на 1 декември, по завршувањето на еднонеделната хуманитарна пауза со Хамас.
Најмалку 17.700 Палестинци загинаа, а над 48.780 лица се повредени во немилосрдните воздушни и копнени напади врз енклавата од 7 октомври, по прекуграничниот напад на Хамас.
Според официјалните податоци, бројот на загинати Израелци во нападот на Хамас изнесува 1.200.
