ИСТАНБУЛ (АА) – Кабинетот на израелскиот премиер Бенјамин Нетанјаху соопшти дека израелската Влада на денешната седница едногласно одлучила да го продолжи нападот врз Рафа, град на југот на Појасот Газа, во кој се сместени околу 1,5 милион раселени Палестинци, јавува Анадолу.
Ова соопштение е објавено и покрај тоа што челникот на Хамас, Исмаил Ханије, денес соопшти дека ова палестинско движење го прифаќа предлогот за прекин на огнот и размена на затворениците што го донесоа посредниците од Катар и Египет.
„Продолжувањето на нападот има цел да ги ослободи израелските затвореници и да ги постигне воените цели“, се вели во соопштението од Кабинетот на Нетанјаху.
Очевидци јавуваат дека израелските воздушни и артилериски сили извршиле силни напади врз источните делови на Рафа и го зајакнуваат военото присуство на границата.
За предлогот за прекин на огнот во Газа што го прифати Хамас, од Кабинетот на Нетанјаху велат дека тоа е далеку од барањето на Израел, но дека се подготвени да пратат делегација во Каиро за да преговара за размена на заробеници.
Шефот на Политичкото биро на движењето Хамас, Исмаил Ханије, денес соопшти дека ги информирал претставниците на Катар и Египет дека ги прифатил предлозите за договорот за прекин на огнот во Појасот Газа.
Соопштението е објавено откако израелските сили издадоа наредба за евакуација на Палестинците во источните населби на градот Рафа, потег што нашироко се смета за увертира за почеток на долготраен израелски копнен напад врз градот.
Извор: Anadolu Agency (AA)
