АНКАРА (АА) – Израелската армија денес соопшти дека извршила повеќе од 200 напади во Газа во текот на ноќта, тврдејќи дека нападнала воени постројки на палестинската група Хамас, јавува Анадолу.
Во соопштението објавено на X, израелската армија соопшти дека нејзините воени авиони и бродови на морнарицата нападнале воени инсталации на групата Хамас, вклучително и место за складирање оружје. Таа тврди дека оружјето било складирано во џамија.
Исто така, се вели дека армијата погодила стан што се користел како складиште за противтенковски наведувани проектили и висока кула што ја користела групата Хамас.
Во меѓувреме, Министерството за внатрешни работи во Газа соопшти дека сите израелски напади биле насочени кон цивили и станбени области.
Канцеларијата за медиуми со седиште во Газа вчера соопшти дека израелската армија извршила 15 масакри врз палестинските семејства за време на нападите во Газа.
Палестинската група Хамас ја започна операцијата „Поплава Ал Акса“ против Израел рано во саботата, истрелувајќи низа ракети и инфилтрирајќи се во Израел по копно, воздух и море. Се наведува дека ненадејниот напад бил одговор на упадот во џамијата „Ал Акса“ во окупираниот Источен Кудс (Ерусалим) и зголеменото насилство на доселениците врз Палестинците.
Како одговор на тоа, израелската војска ја започна операцијата „Железни мечеви“ против Хамас во Појасот Газа.
Бројот на Палестинци кои загинаа во нападите на израелските сили во Газа се искачи на 704, од кои 143 деца и 105 жени, соопшти рано утринава Министерството за здравство со седиште во Газа. Се наведува дека бројот на ранети се искачил на околу 4.000.
Според израелското Министерство за здравство, во борбите се убиени најмалку 900 Израелци, а над 2.600 се ранети.
