КУДС (ЕРУСАЛИМ) (АА) – Израелската војска објави дека Соединетите Американски Држави (САД) го распоредиле антибалистичкиот ракетен одбранбен систем ТХААД (THAAD) во Израел поради тензиите со Иран, пренесува Анадолу.
Израелското армиско радио го нарече потегот дел од подготовките за очекуваниот израелски одговор на неодамнешниот ирански ракетен напад.
Иако се наведува како „прво“ распоредување од ваков вид, САД најавија привремено распоредување на системот за противракетна одбрана во март 2019 година, како дел од заедничките одбранбени вежби.
Останува нејасно дали сегашното распоредување е трајно.
Израелскиот Канал 12 објави дека американските војници „за прв пат ќе управуваат“ со батериите на системот во Израел.
ТХААД, развиен од компанијата „Локхид Мартин“, е одбранбено оружје наменето за пресретнување на балистички ракети со краток и среден дострел на големи височини.
Производителот тврди дека ТХААД е единствениот американски систем дизајниран да пресретнува цели внатре и надвор од атмосферата.
Пред ТХААД, израелската противвоздушна одбрана се потпираше на три системи: „Стрела“ за ракети со долг дострел, „Давидова прачка“ за ракети од среден дострел и „Железна купола“ за ракети со краток дострел – од кои сите не успеаја да пресретнат многу ирански ракети за време на неодамнешниот напад.
Иран започна напад на 1 октомври со околу 180 ракети како одмазда за атентатите на поранешниот шеф на политичкото биро на Хамас, Исмаил Ханије, во Техеран, како и врз други цели, меѓу кои и лидерот на Хезболах, Хасан Насрала, и лидерот на Револуционерната гарда, Абас Нилфорушан.
Израелската армија подоцна призна дека нападот предизвикал штета на некои воздухопловни бази, тврдејќи дека подготовките за одмазда против Техеран се во тек.
Иран ги бранеше своите акции, повикувајќи се на член 51 од Повелбата на Обединетите нации, кој го потврдува правото на земјите членки да користат сила во самоодбрана од вооружени напади.
Извор: Anadolu Agency (AA)
