ГАЗА (АА) – Здравствените власти во Газа повикаа на истрага откако израелските сили беа обвинети дека користеле булдожери и пуштале кучиња напаѓачи за време на рацијата во болницата Камал Адван, јавува Анадолу.
Израелските сили извршија рација во болницата минатата недела откако ја опколија и гранатираа неколку дена.
На вчерашната прес-конференцијата, Мунир ал-Бурш, генералниот директор на болниците во Појасот Газа, и шефот на педијатрискиот оддел на болницата Хусам Абу Сафија, изјавија дека израелските сили уништиле некои делови од медицинската установа, не дозволувале пристап до помош и ги нападнале здравствените работници, ранетите и раселените цивили кои бараат засолниште.
Бомбардирани беа влезот на болницата и околината, истрели беа испукани во зградите во комплексот на болницата, вториот кат во кој се наоѓа породилното одделение беше бомбардиран. Директорот на болницата Ахмед ал Кахлут беше приведен и однесен на непозната локација.
„Израелските војници ги собраа раселените цивили и здравствените работници, кои побараа засолниште во болницата, во голема јама, полуголи и пуштија врз нив кучиња напаѓачи. Израелската градежна механизација ги уништи кислородната единица на болницата, резервоарот за вода, централната архива и аптеката“, рече тој.
„Израелските сили употребија булдожер за ископување голема јама во дворот на болницата и фрлија приближно 12 тела на оние што ги убија во јамата. Не знаеме дали има некој од ранетите меѓу оние кои беа фрлени во јамата. Бараме соодветна меѓународна истрага за овие грозоморни злосторства“, додаде тој.
Абу Сафија рече дека израелските војници пуштиле кучиња напаѓачи врз 75-годишно рането лице, кое починало следниот ден.
Тој рече дека слушнале врисоци кога израелските војници со булдожери поминале низ шаторите во дворот на болницата и се сомневаат дека некои луѓе биле згмечени до смрт.
Претходно, палестинската министерка за здравство Маи ал-Каила повика на меѓународна истрага за израелските дела.
Повеќе од 18.700 Палестинци се убиени во израелските напади од 7 октомври.
Според официјалните бројки, бројот на загинати во Израел изнесува 1.200.
