РАМАЛА (АА) – Израелската армија денес приведе уште 16 Палестинци во воените упади низ окупираниот Западен Брег, јавува Анадолу.
Приведувањата се извршени во градовите Џенин, Тубас, Калкилија, Витлеем и Хеброн, се вели во заедничката изјава на Комисијата за прашања на затворениците и Здружението на палестински затвореници.
Израелските сили ги нападнале и им се заканувале на приведените и на членовите на нивните семејства и ги уништувале нивните домови, се додава во соопштението.
Според палестинските податоци, со новите приведувања вкупниот број Палестинци од Западниот Брег кои израелската армија ги има приведено од октомври минатата година достигна 9.970, меѓу кои и оние кои се по извесен период ослободени.
Во соопштението се истакнува дека во овој број не се вклучени приведените од Појасот Газа, кој се проценува на илјадници.
Во текот на изминатите неколку години израелската армија спроведуваше редовни рации на Западниот Брег, кои ескалираа со почетокот на војната во Газа на 7 октомври 2023 година. Палестинците, исто така, беа насилно напаѓани од илегалните еврејски доселеници.
Според Министерството за здравство, оттогаш на Западниот Брег се убиени најмалку 611 Палестинци, а речиси 5.400 се повредени од оган на израелската армија на окупираната територија.
Меѓународниот суд на правдата на 19 јули ја прогласи повеќедецениската окупација на Палестина од страна на Израел за „нелегална“ и побара евакуација на сите постојни населби на Западниот Брег и во Источен Ерусалим (Источен Кудс).
Извор: Anadolu Agency (AA)
