ГАЗА (АА) – Палестинската влада во Појасот Газа објави дека израелската армија ја запалила болницата „Камал Адван“ во северниот дел на Појасот Газа, со што болницата е надвор од употреба, а медицинските екипи и ранетите се однесени на непозната локација, известува Анадолу.
„Израелската окупаторска армија ја запали болницата ‘Камал Адван’ во Газа, ставајќи ја надвор од употреба. Израел продолжува со злосторства врз здравствениот систем со одведување на стотици медицински персонал, ранети и нивните придружници на непозната локација“, се вели во соопштението на канцеларијата за медиуми.
Во соопштението се наведува дека по долга опсада, израелската армија ја разнесе областа околу болницата користејќи роботи натоварени со експлозив, а потоа бомбардираше голем дел од зградата и уби 5 медицински лица во рок од 24 часа, додавајќи: „Израел приведе повеќе од 350 лица во болница, вклучувајќи 180 медицински персонал и 75 ранети, пациенти и нивните придружници“.
Во соопштението се нагласува дека израелските војници под закана со оружје ги принудиле притворените Палестинци да се соблечат и ги однеле на непозната локација, со што целосно е прекината комуникацијата со управата и персоналот на болницата.
„Таргетирањето на болниците има за цел да го елиминира здравствениот систем во Појасот Газа, како дел од политиката на геноцид врз палестинскиот народ“, се вели во соопштението, обвинувајќи ги Израел, американската администрација и земјите кои ги поддржуваат, како Англија, Германија и Франција, дека се целосно одговорни за предметните злосторства.
Во соопштението се повикува меѓународната заедница, Обединетите нации и здравствените организации да го прекинат својот молк и да преземат практични мерки за да се запрат овие злосторства.
Израелската армија денеска изврши рација во болницата „Камал Адван“ во Појасот Газа и под присила ги истерал од објектот медицинскиот персонал и ранетите, по што запалил делови од болницата.
Од 7 октомври досега, во израелските напади врз Појасот Газа, убиени се 45.436 Палестинци, вклучувајќи приближно 17.492 деца и 11.979 жени, а 108.038 се повредени.
И додека Израел продолжува со масакрите и уништувањето на цивилната инфраструктура, таргетирајќи болници и образовни институции во кои се засолниле Палестинците, припадниците на цивилната заштита и медицинскиот персонал не можат да пристапат до илјадниците мртви што се наоѓаат под урнатините и на патиштата поради израелските блокади.
Извор: Anadolu Agency (AA)
