РАМАЛА (АА) – Израелската Армија денес ја уништи зградата на Агенцијата на ОН за палестински бегалци (УНРВА) во бегалскиот камп Нур Шамс во градот Тулкарем на северниот дел на Западниот Брег, изјави локален претставник, јавува Анадолу.
„Израелските булдожери ја срушија зградата, преку која Агенцијата на ОН управуваше со секојдневните потреби на жителите“, изјави за Анадолу, Нехад ал-Шавих, кој раководи со локалниот комитет за услуги во кампот.
„Зградата беше делумно оштетена за време на претходните израелски напади, а денес беше целосно урната од израелските сили“, додаде тој.
Уривањето на зградата се случи по три дена откако Кнесетот (израелскиот Парламент) во понеделникот го усвои законот со кој се забранува работата на УНРВА, што на крајот ќе влијае на нејзината работа во Газа, окупираниот Западен Брег и Источен Ерусалим. Законот ќе стапи на сила за 90 дена.
Генералниот комесар на УНРВА, Филип Лазарини, рече дека израелската забрана е „без преседан и опасна“ и претставува прекршување на Повелбата на ОН.
Според палестинската официјална новинска агенција Вафа, во кампот Нур Шамс има две училишта и еден здравствен центар управуван од УНРВА.
Претходно денес, двајца Палестинци, меѓу кои и едно дете, беа убиени во напад на израелско беспилотно летало во кампот, според Министерството за здравство.
Тензиите се зголемени низ Западниот Брег поради бруталната офанзива на Израел врз Појасот Газа, во која се убиени над 43.100 луѓе, главно жени и деца, од октомври минатата година.
Најмалку 766 Палестинци оттогаш се убиени, а околу 6.300 се повредени од истрели на израелската Армија на Западниот Брег, објави палестинското Министерство за здравство.
Извор: Anadolu Agency (AA)
