РАМАЛА (АА) – Израелската Армија приведе најмалку 30 Палестинци во новите воени рации во окупираниот Западен Брег, јавува Анадолу.
Меѓу приведените Палестинци се наоѓале и поранешни затвореници, се вели во заедничката изјава на Комисијата за прашања на затворениците и Здружението на палестински затвореници.
Силите на израелската Армија задржаа над 200 луѓе во градот Азун, источно од Калкилија на северниот дел на Западниот Брег, на теренско испрашување пред да ги ослободат, се вели во соопштението.
Приведувањата се извршени во време на ескалација на израелската војна на северниот дел на Западниот Брег, каде што од 21 јануари досега загинаа најмалку 68 луѓе, а илјадници се раселени.
Според палестинските податоци, новите приведувања го зголемија бројот на приведени Палестинци од страна на израелската Армија на Западниот Брег од октомври 2023 година на над 14.500, вклучувајќи ги и оние кои беа ослободени откако биле приведени.
Бројката не ги вклучува приведените од Појасот Газа, чиј број се проценува на илјадници.
Во текот на изминатите неколку години, израелската Армија спроведуваше редовни рации на Западниот Брег, кои ескалираа со почетокот на војната во Газа на 7 октомври 2023 година. Палестинците, исто така, беа нападнати од нелегалните израелски доселеници.
Најмалку 934 Палестинци оттогаш се убиени, а над 7.000 други се повредени од оган на израелската Армија на окупираната територија, според Министерството за здравство.
Меѓународниот суд на правдата во јули 2024 година ја прогласи повеќедецениската окупација на Палестина од страна на Израел за нелегална и побара евакуација на сите постоечки населби на Западниот Брег и во Источен Ерусалим.
Извор: Anadolu Agency (AA)
