КУДС/ЕРУСАЛИМ (АА) – Израелскиот министер за одбрана, Јоав Галант, вчера изјави дека очекуваната копнена операција во Појасот Газа „може да трае со месеци“, пренесува Анадолу.
Галант ја даде изјавата на седницата на оперативната команда на Воздухопловните сили во близина на границата со Појасот Газа.
„Ова треба да бидат последни [копнени] маневри во Газа, бидејќи по нив веќе нема да има Хамас. Ќе биде потребен еден месец, два, три месеци, но на крајот нема да има повеќе Хамас“, истакна министерот пренесоа изралските медиуми.
„Ништо не може да ја запре [израелската армија]. Оперативната страна на маневарот е комбинација од две работи: капацитет на воздухопловните сили и копнената операција“, рече Галант, објави весникот „Једиот Ахронот“.
Претходно вчера, израелската војска објави дека ќе ги интензивира воздушните напади врз Појасот Газа со цел да ги намали заканите на кои може да се соочат нејзините сили во Газа, како подготовка за следната фаза од војната, мислејќи на копнената операција.
Израелската армија продолжува со водушните напади врз Газа во кои се уништени цели населби.
Најмалку 4.651 Палестинец, меѓу кои 1.873 деца, загинаа во израелските напади врз Газа.
Неутврден број луѓе се заробени под урнатините.
Конфликтот во Газа, која е под израелско бомбардирање и опсада од 7 октомври, започна кога Хамас ја почна операцијата „Поплава Ал Акса“, ненадеен напад со низа лансирања на ракети и инфилтрирање во Израел преку копно, море и воздух. Хамас наведе дека операцијата е одмазда за упадите во џамијата „Ал Акса“ и зголеменото насилство од страна на еврејските доселеници врз Палестинците.
Потоа израелската војска ја започна операцијата „Железни мечеви“ кон позициите на Хамас во Појасот Газа.
Газа се соочува со тешка хуманитарна криза, без струја, а водата, храната, горивото и медицинските материјали се при крај.
