КУДС (ЕРУСАЛИМ) (АА) – Израелската војска денес одлучи да ја премести 98. елитна бригада од Појасот Газа на северната граница со Либан, јавува Анадолу.
Овој потег се презема во период на зголемена тревога во Израел во очекување на потенцијален напад од Хезболах по масовните експлозии на пејџери во Либан.
„Со максимална подготвеност на северниот фронт, израелската армија одлучи таму да ја премести 98. елитна бригада“, јави израелското армиско радио. „Бригадата првично требаше да продолжи со борбите во Газа, но последниве денови одлучено е да се премести на север.“
Израелската државна телевизија Кан истакна дека бригадата го напуштила Кан Јунис во јужниот дел на Газа пред три недели и заминала на неодредена локација во енклавата. Се истакнува дека бригадата се состои од три дивизии на оклопни сили, падобранци и командоси.
Според либанското Министерство за здравство, денес во нов бран експлозии на безжични уреди за комуникација во Либан загинаа најмалку девет лица, а над 300 се повредени. Во изминатите два дена во слични експлозии загинаа 21 лице, а повеќе од 3.000 беа повредени.
Хади Хачем, либанскиот амбасадор во Обединетите нации, експлозиите на пејџери ги нарече „агресија што се претвора во воено злосторство“, предупредувајќи дека тие ќе го влошат конфликтот.
Од Израел нема коментар за експлозиите, а Хезболах вети дека ќе возврати.
Експлозиите на пејџерите се случија во време на зголемени погранични ескалации меѓу Израел и Хезболах, кои разменуваат прекуграничен оган од почетокот на смртоносната војна на Тел Авив во Појасот Газа, во која од 7 октомври минатата година загинаа речиси 41.300 луѓе, главно жени и деца.
Извор: Anadolu Agency (AA)
