КУДС (АА) – Израелската Армија понуди финансиски награди за Палестинците кои ќе споделат информации за тоа каде се заложниците што ги држи Хамас во Газа, јавува Анадолу.
„Доколку сакате подобра иднина за вас и вашите деца, преземете акција и обезбедете ни солидни и корисни информации што е можно поскоро во врска со заложниците во вашата област“, пишуваше во летоците што израелската Армија ги фрли во Газа.
„Израелската Армија ве уверува дека ќе вложи максимални напори за да ви обезбеди сигурност вам и на вашиот дом, како и финансиска награда“, се вели во летоците.
„Ви гарантираме целосна доверливост“, рекоа тие, обезбедувајќи мобилен број каде што може да се испраќаат информации.
Израелската Армија вчера соопшти дека 222 заложници се задржани од Хамас во Појасот Газа.
Конфликтот во Газа, која е под израелско бомбардирање и блокада од 7 октомври, започна кога Хамас ја почна операцијата „Поплава Ал Акса“, повеќестран ненадеен напад со низа лансирања на ракети и инфилтрирање во Израел по копно, море и воздух. Се наведува дека операцијата е одмазда за упадите во џамијата „Ал Акса“ и зголеменото насилство од страна на еврејските доселеници врз Палестинците.
Потоа израелската војска ја започна операцијата „Железни мечеви“ кон позициите на Хамас во Појасот Газа.
Во конфликтот загинаа повеќе од 7.100 луѓе, меѓу кои најмалку 5.791 Палестинец и 1.400 Израелци.
