Власта ветува дека нема да ја искористи истрагата на обвинителството против се уште актуелната претседателка на Државната комисија за спречување на корупцијата Татјана Димитровска, за да ја блокира работата на оваа институција која е задолжена за контрола токму на работењето на државните функционери. Оваа најава и ветување доаѓа од министерот за дигитална трансформација Стефан Андоновски против кого токму ДКСК води четири предмети.
„Според мене не постои можност за парализирање на институцијата доколку продолжи овој состав да функционира. Исто така, не гледам причина зашто преостанатите членови би сноселе одговорност за личните постапки на еден од членовите, потенцијални постапки, затоа што станува збор за осомничено лице и не би сакал дополнително да се впуштам во политизација на процесот, затоа што овој состав, како минатиот состав на ДКСК беше избран во Собрание со поддршка на сите политички партии, вклучително и на невладина организација во една транспарентна постапка…“, вели Стефан Андоновски.
Андоновски очекува Димитровска да си поднесе оставка бидејќи според него не е примерно да ја извршуваа оваа функција додека против неа се води постапка, потенцирајќи дека сепак мора да се води грижа за пресумпција на невиност.
Министерот смета дека не е нарушен кредибилитетот на Антикорупциска.
„И во еден ваков пример кога потенцијално овој член би си дал оставка, сметам дека во таква постапка ќе нема простор за омаловажување, дискредитација на потенцијални нови членови на таа Комисија, така што мислам дека нивната работа со пример, со дела, треба да покажат дека е кредибилна“, вели Стефан Андоновски.
Инаку, вчера дел од политичките партии побараа оставка на целата Антикорупциска комисија, сметајќи дека е нарушен нивниот кредибилитет.
ИЗВОР: ТВ 21
