БАГДАД (АА) – Врховниот суд на Ирак презеде чекори за екстрадиција на Салван Момика, со ирачко потекло, кој го запали Куранот во Шведска, како и да му се суди во Ирак, пренесува Анадолу.
Претседателот на Врховниот судски совет, Фаик Зејдан, нареди да се преземат потребните правни дејствија за Ирачанецот кој запали примерок од Куранот во Стокхолм, главниот град на Шведска, да биде вратен во земјата и да биде изведен пред суд, објави ирачката новинска агенција ИНА.
Од друга страна, во писменото соопштение на Министерството за надворешни работи на Ирак, се наведува дека ја осудуваат оваа акција против Куранот.
„Оваа акција е провокација против муслиманите. Ја повикуваме меѓународната заедница да преземе одговорност против сите форми на екстремизам“, се вели во соопштението, во кое се нагласува дека е изненадувачки што шведските власти го дозволиле тоа.
Ирачкиот шиитски верски и политички лидер Муктада ал Садр повика на протерување на шведскиот амбасадор во Багдад и на протести пред Амбасадата поради нападот врз Куранот.
Вчера, лице идентификувано како Салван Момика, по потекло од Ирак, запали копија од Куранот под полициска заштита пред џамија во Стокхолм.
Шведскиот апелационен суд на 12 јуни ја потврди одлуката на понискиот суд за поништување на забраната за палење на Куранот, пресудувајќи дека полицијата немала правна основа да спречи два протести за палење на Куранот претходно оваа година.
Извор: www.aa.com.tr
