Двајца работници од Комунална хигиена ја метеле улицата Наум Наумовски Борче во критичниот моментот кога е киднапирана Вања Ѓорчевска. Со стеги биле врзани рацете и нозете на 14 годишното девојче, а на устата имало салотејп трака. Вака сведочеше денеска началникот на единицата за насилен криминал, Дејан Димовски.
„Па не знам дали тие луѓе биле обезбедени. Дали е направен обид да се стапи во контакт со нив, а тие луѓе биле критичниот момент кога возилото како што опиша началникот биле пред зградата на Наум Наумовски Борче“, порача Владимир Туфегџиќ.
Единственото место кое не е покриено со камера е излезот од зградата. На 10 метри лево и десно од зградата каде се наоѓаат и работниците веќе има покриеност. Но тие продолжуваат со работата и воопшто не се вртат. Денешното рочиште ги разјаснува трагичните настани, но фрла сенка врз улогите кои ги имале обвинетите лица.
„Нам ни беше чудно како таткото веднаш можеше да заклучи дека девојчето е киднапирано и убиено, без никакви конкретни докази. Дури велеше дека логично му било по филмовите што ги гледал“, вели Дејан Димовски.
Началникот додаде дека токму таткото ги упатувал истражителите на сомнителни лица и возила, вклучувајќи го „Рено Кангу“ кое подоцна било поврзано со осомничените. Дополнителен пресврт во истрагата донеле исказите на Велибор Манев и Боре Видевски, кои го обвиниле таткото за директна вмешаност.
„Тие ни кажаа дека токму таткото на Вања му дал на Палчо информации за тоа кога девојчето ќе биде само на денот на киднапирањето“, вели Дејан Димовски.
Еден од најемотивните моменти на денешното судење беше сведочењето за откривањето на телото на Вања. Истражителите, водени од Влатко Кекишев, го пронашле телото на девојчето во околината на местото викано „Бразда“. Кон крајот на рочиштето, потиштен и со солзи во очите сведочеше чичкото на Вања.
„Ми кажа Зорица дека Вања ја нема и дека последната локација на телефонот е кај Силбо. Јас живеам во близина и веднаш отидов со велосипед. Пребарував немаше ништо. Дојде Сашо (н.з Александар таткото на Вања) заедно со полицаец. Ми рече, „Ако е утепана Вања, ќе се отепам и јас“. Ми беше чудно однесувањето, јас му реков: Земи отепај се!“, вели Митре Лазаров.
Полицијата од родителите дознала дека Вања претходно имала обид за самоповредување, откако се скарале родителите. Се проверувала и врска со момче од Шведска, на чиј профил пак имало знамиња од ИСИС.
„Постапувале без било какви правила и стандарди за постапување во ваков случај. Секој постапувал според некое свое наоѓање. Слушнавме дека отишле во една насока со истрагата, па после застанале, па тргнале во сосема дрига насока“, вели Владимир Туфегџиќ.
Началникот потврди дека воопшто никој не добил повик со барање за откуп, а од обвинетите не се направени парафински ракавици бидејќи поминало повеќе од една недела од убиството до апсењето. Оружје со кое се извршени убиствата не е пронајдено.
ИЗВОР: ТВ 21
