АЛ-КУДС/ЕРУСАЛИМ (АА) – Меѓу 1.500 и 3.000 Палестинци ги напуштија своите домови во бегалскиот камп Џенин поради израелската воена операција што е во тек во градот, покажуваат денешните податоци на израелската војска, пренесува Анадолу.
Израелската Армија вчера ја започна својата најголема воена операција во Џенин во последниве повеќе од 20 години, во којашто загинаа најмалку десет Палестинци, а повредени се над 100, соопшти палестинското Министерство за здравство.
Портпаролот на војската, Даниел Хагари, тврди дека на Палестинците им било дозволено да ги напуштат своите домови во Џенин без да бидат принудени на тоа.
„На секој што сака да го напушти бегалскиот камп му е дозволено“, рече Хагари, пренесе државната телевизија КАН.
Тој наведе дека за време на операцијата во бегалскиот камп Џенин биле приведени 120 Палестинци.
Израелската војска проценува дека во кампот се наоѓаат околу 350 палестински вооружени напаѓачи.
Израелската воена операција во Џенин доаѓа во време на зголемени тензии на окупираниот Западен Брег во последните месеци и повторените израелски напади врз палестинските градови.
Палестинското Министерство за здравство соопшти дека од почетокот на годината од израелски оган загинале речиси 190 Палестинци. Најмалку 25 Израелци исто така го изгубиле животот во одделни напади во истиот период.
Извор: www.aa.com.tr
