ЊУЈОРК (АА) – Властите денес го идентификуваа лицето што изврши напад врз седиштето на турската дипломатија во Њујорк, јавува Анадолу.
Турските власти вчера споделија информации за сторителот со полицискиот оддел во Њујорк.
Реџеп Акбијик, турски државјанин кој ја напуштил Туркије минатата година, сѐ уште е во бегство, соопшти полицијата.
Тој, како што се наведува, е бездомник и има психички проблеми.
Центарот „Туркеви“ (Турска куќа) во Њујорк, зграда во која се сместени дипломатски мисии и во која се одржуваат културни настани, отворена во 2021 година спроти зградата на Обединетите нации во Њујорк, беше нападната во понеделникот.
Акбијик ги искрши стаклата на зградата во 3:14 часот по локално време.
Во нападот нема повредени, но оштетени се 12 прозорци и вратите на зградата.
Турските власти остро го осудија нападот и ги повикаа локалните власти да го пронајдат напаѓачот и да ја обезбедат потребната заштита, со цел да се осигури безбедноста на нивните дипломатски претставништва.
Извор: www.aa.com.tr
