Православните христијани денеска го слават големиот празник Христово раѓање Божиќ. Од изутрина во сите црковни храмови се одржуваат божиќни литургии каде присуствуваа голем број граѓани. Тие меѓу себе се поздравуваат со Христос се роди, честит Божиќ.
„За мене е ова најголемиот православен празник, им порачувам на сите православни да одат на литургија, да живеат според божјите заповеди. Посакувам многу повеќе љубов да имаме, многу повеќе да се помагаме и во добро и во лошо, тоа е православието“.
„За многу години нека ни е, живи и здрави, државата да ни оди напред, младите тука да ни бидат до нас“.
„Радост, љубов, се најдобро во светот, очекуваме многу нешта верувајќи во Бога па ако се оствари“.
На утринската литургија присуствуваше и државниот врв. Претседателката Гордана Силјановска Давкова го честиташе празникот за кој рече дека ова за христијаните е ден над деновите.
„Христос се роди. Јас веќе кажав, веројатно Ден над деновите за сите христијани. Се надевам дека навистина како што архиепископот неколку пати напомена дека ова ќе значи дека знаеме дека ѕвездата од Витлеем не` води и дека најдоброто од нас ќе се разбуди на овој ден“, вели Гордана Сиљановска Давкова.
Честитки за денот на Христовото раѓање упати и премиерот Христијан Мицкоски.
„Христос се роди, навистина се роди, нешто што претставува голем ден за православните христијани, а на сите граѓани во нашата Македонија да им посакам пред се здравје, затоа што здравјето е најважно а потоа сите убавини на овој свет во нивните домови да им се случат. Очекувам година во која што ќе имаме напредок, година на прогрес на секој план“, вели Христијан Мицкоски.
Во името на Собранието претседателот на законодавниот дом Африм Гаши порача празникот да донесе мир и хармонија.
„Овој ден е можност да се нагласи важноста на вредностите кои не обединуваат како општество: толеранцијата, солидарноста и почитта еден кон друг. Посакувам овој празник да донесе мир, хармонија и радост во вашите срца и вашите семејства. Нека оваа година биде година исполнета со успех, бериќет и здравје за сите вас“, вели Африм Гаши.
Претседателот на опозициската СДСМ Венко Филипче посака мирни празнични денови.
„Со традиционалната честитка Мир Божји, Христос се роди го честитам најголемиот христијански празник, Христовото раѓање на сите граѓанки и граѓани кои денеска празникот го слават. Посакувам мирни празнични денови, онака како што налага традицијата, во кругот на семејството, пријателите и блиските“, вели Венко Филипче.
Честитки за големиот христијански празник Божиќ упатија и лидерите на политичките партии и здруженија.
ИЗВОР: ТВ 21
