ГАЗА (АА) – Хамас денеска изјави дека управувањето со Појасот Газа е „чисто палестинска работа“, како одговор на изјавите на Соединетите Американски Држави (САД) дека тоа движење не може да биде дел од равенката за управување во таа енклава, јавува Анадолу.
„Управувањето со Газа или дел од нашата земја е палестинска работа и ниту една сила нема да може да ја промени реалноста или да ја наметне својата волја“, изјави портпаролот на Хамас, Абдул Латиф ал Кану.
Портпаролот на Белата куќа за национална безбедност, Џон Кирби, денес изјави дека Хамас не може да биде дел од равенката за управување во Газа.
„Потребна е здрава низа разговори за тоа како ќе изгледа Газа по конфликтот и управувањето“, додаде Кирби.
Абдул Латиф ал Кану го нарече повикот на Кирби за соборување на Хамас „чиста фантазија“.
„Хамас е движење за национално ослободување и живее во секој палестински дом. Хамас е составен дел од нашиот народ и има право да се спротивстави на окупацијата во согласност со сите закони и обичаи“, рече Ал Кану.
Израел започна немилосрдни воздушни и копнени напади врз Појасот Газа по прекуграничниот напад на Хамас пред еден месец.
Оттогаш, најмалку 10.328 Палестинци се убиени, меѓу кои 4.237 деца и 2.719 жени. Според официјалните податоци, бројот на загинати во Израел изнесува 1.600.
Освен големиот број жртви и масовното раселување, при крај се и основните резерви за 2,3 милиони жители во Газа како последица на израелската опсада
