Богатите и моќните се собираат во Давос за да разговараат за климата и нееднаквоста. Во тој процес, тие го користат најштетното еколошко превозно средство во светот: приватниот авион, велат од „Гринпис“
Меѓународната еколошка организација „Гринпис“ повика на забрана за летови со приватни авиони кои емитуваат јаглерод. Повикот на „Гринпис“ доаѓа пред годишниот Светски економски форум во Давос, кој ја привлекува светската деловна и политичка елита.
Европската комисија треба да го отвори патот за ваква регулатива во сегашната ревизија на Регулативата за воздушниот сообраќај, наведува еколошката организација во новиот апел пред состанокот во Давос.
Кратките летови со приватни авиони се очекува повторно да се зголемат пред Светскиот економски форум во швајцарското планинско одморалиште следната недела.
Според студијата на консултантската компанија „ЦЕ Делфт“ нарачана од „Гринпис“, 1 040 приватни авиони слетале или полетале од седум аеродроми во близина на Давос за време на минатогодишниот собир.
„Богатите и моќните се собираат во Давос за да разговараат за климата и нееднаквоста. Во тој процес, тие го користат најштетното еколошко превозно средство во светот: приватниот авион“,
рече Клара Марија Шенк од „Гринпис“.
Светскиот економски форум тврди дека ја унапредува меѓународната климатска политика. Освен многубројните настани на таа тема, годишната конференција треба да биде и климатско неутрална.
Затоа Форумот им препорачува на своите учесници да патуваат со воз и ги советува да избегнуваат кратки летови.
Од 2017 година, форумот секоја година ги компензира своите емисии и има политика за одржливост која поттикнува употреба на електрични возила, сезонски прехранбени производи и рециклирање.
Употребата на приватни авиони од страна на корпоративните шефови е повторно под лупа во последниве години, благодарение на профилите на Твитер кои ги следат летовите на авионите за кои се знае дека ги користат високи раководители.
Извор: 360stepeni.mk
