Новата мерка ќе ги опфати и туристите кои доаѓаат во градот со своите миленици. Така, сопствениците-туристи ќе мора да плаќаат дневен данок од 1,50 евра по куче, додека тамошното население ќе издвојува годишен данок од 100 евра.
Како што е познато, ова не е прва ваква иницијатива – претходно, Болцано воведе барање за регистрација на ДНК од кучиња, за нечистењето измет да може да се казнува и до 600 евра. Патем, новата мерка е претставена од градските власти како начин за финансирање на чистењето на улиците и изградба на нови паркови за кучиња, но сепак, новиот трошок предизвика контроверзии. Дел од јавноста е загрижена од гласините дека кучињата би можеле да бидат забранети во обичните градски паркови. Советникот Луи Валкер објасни дека сопствениците на кучиња кои веќе ја регистрирале ДНК-та на своите миленици ќе бидат ослободени од новиот данок две години.
– Ова е фер мерка, бидејќи се однесува исклучиво на сопствениците на кучиња. Во спротивно, чистењето на тротоарите би било на трошок на целата заедница, рече Валкер.
Сепак, противниците предупредуваат дека оваа мерка „ги претвора животните во даночни обврзници“, како што рече Карла Роки од Националната агенција за заштита на животните.
– Болцано си дава автогол со данокот на кучиња. Ваквите мерки испраќаат длабоко погрешна порака и непотребно ги казнуваат семејствата и туристите кои патуваат одговорно со своите миленици. Парадоксално е што во област што живее од туризмот, ги таргетирате токму оние кои избираат инклузивни и одговорни одмори со своите кучиња, изјави Роки.
Активистката предупреди дека потегот може да доведе до обесхрабрување на сопствениците и напуштање на животните.
Извор: vecer.mk
