Кандидатот за градоначалник на Скопје, Орце Ѓорѓиевски, денеска одржа средба со претставници на невладините организации и здруженијата на граѓани од главниот град. На средбата, како што информира тој, се разговарало за клучните предизвици со кои се соочуваат скопјани, но и за идните решенија кои може да се применат врз основа на европските практики.
„Остваривме искрен и отворен муабет за проблемите од минатото, но уште поважно – за конкретните идеи за иднината. Невладините ни дадоа значајни предлози во областа на животната средина, хигиената, социјалната заштита, културата, младите, како и за лицата со инвалидитет, ретки и хронични болести“, изјави Ѓорѓиевски.
Тој нагласи дека сите предлози се внимателно забележани и дека ќе бидат интегрирани во неговата програма за Скопје.
„Верувам дека вистинскиот пат е партнерски однос – заедничка работа, почит и визија за достоинствено Скопје. Во мене секогаш ќе имаат пријател и човек за искрена соработка“, порача Ѓорѓиевски.
Кандидатот за градоначалник оцени дека градот заслужува повеќе и додаде дека со заедничка работа „ќе се врати достоинството и ќе се изгради Скопје какво што сите сакаме“.
