Кандидатот за градоначалник на Град Скопје, Орце Ѓорѓиевски, на собир со граѓаните упати порака дека „масовната поддршка е јасен знак за голема победа“.
„Скопје е нашата приказна, нашата гордост и нашата иднина. Градот каде што растеме, сонуваме, но и се соочуваме со загадениот воздух, метежот и депониите. Затоа велам – на Скопје му треба прво човек, па потоа градоначалник“, изјави Ѓорѓиевски.
Тој потсети на своето искуство како градоначалник на Општина Кисела Вода, нагласувајќи дека таму биле решени проблеми кои траеле со децении, а денес има нови училишта, градинки, паркови и спортски сали.
„Тоа искуство денес го носам во Скопје. Верувам дека можеме заедно да ја вратиме вербата и гордоста во нашиот град. Скопје заслужува јавен превоз кој ќе биде вистински сервис на граѓаните, повеќе зелени површини и град кој ќе се грижи за сите, без исклучок“, порача Ѓорѓиевски.
Тој додаде дека на претстојните избори не се гласа само за една партија или личност, туку за работа, докажани резултати и чесен збор.
„Скопје ќе го направиме заедно, по скопски. За нашите деца, за идните генерации, за град кој ќе биде гордост на сите негови жители“, истакна Орце Ѓорѓиевски.
