Претседателот на ЗЕЛС и градоначалник на Кисела Вода, Орце Ѓорѓиевски, изјави дека нема конкретни информации дали Владата планира да му ги одземе ингеренциите на Град Скопје за ЈСП Скопје, иако, како што рече, премиерот ја спомена таа можност. Тој додаде дека Владата сериозно размислува за ова прашање бидејќи тоа ги засега сите скопјани, и потенцираше дека не се решени и други проблеми како комуналната хигиена и нефункционалноста на некои јавни претпријатија.
Ѓорѓиевски истакна дека на состанокот со Владата, планиран за крајот на годината, ќе се отвори и ова прашање.
Во одговор на прашањето за можната блокада на општините поради буџетот на Град Скопје за 2025 година, Ѓорѓиевски рече дека ова ќе биде разгледано на денешното Генерално собрание на ЗЕЛС. Тој додаде дека градоначалничката Арсовска, по смената од позицијата претседател на ЗЕЛС, ретко учествува во работата на организацијата, но денеска ќе присуствува претседателот на Советот на Град Скопје, Трајко Славески, со кого ќе се разговара за актуелната ситуација.
ИЗВОР: ТВ 21
