По пет години соработка, Новак Ѓоковиќ и неговиот тренер Горан Иванишевиќ решија да се разделат професионално.
Иванишевиќ во интервју за Спорт Клуб ги откри причините за ваквата одлука која со денови е главна вест во тениската јавност.
-Читав многу… Луѓето мора да пишуваат, но никој не беше блиску до тоа да го погоди. Не постои вистинска причина, вистинската причина е заситеноста. Ова беа исклучително тешки пет години, луѓето ја забораваат короната и дека во еден момент тој беше негативец број еден во светот поради тоа што не се вакцинираше. Секогаш бевме во некој меѓучекор, некој министер ќе забрани, лудило со Австралија… Имаше заситеност, до замор на материјалот – и автомобилот оди на технички… И тој се измори од мене, а и јас се изморив од него. Не можев повеќе да му помогнам, но направивме голема работа, вели Иванишевиќ во интервјуто.
Сега веќе поранешниот тренер на Ѓоковиќ вели дека уште минатата година на УС Опен почувствувал дека се ближи нивната разделба.
-Вимблдон беше навистина тежок за мене како тренер, Алкараз беше подобар на крајот и секоја чест за него, но еден или два бода… Америка беше неверојатна, Синсинати и УС Опен беа освоени, а јас веќе чувствував дека крајот е близу. . Беше прашање дали на крајот на годината или некаде оваа година… Можеби требаше да го направиме тоа минатата година, но по УС Опен имав операција на коленото, ме немаше шест или седум недели, се вратив за Торино, но веќе беше замор на материјал и комуникација…Сега кога разговаравме во Америка, Новак рече една вистинска работа: „Не постои вистински момент, нема погрешен момент, но има само момент кога тоа ќе се случи“, кога двајца луѓе одлучуваат и зборуваат како ние двајцата. Сакав после Австралија, но тој отиде на скијање, брзо помина еден месец и – ајде во Америка. Морам да кажам дека одлично си поминавме – опуштено. Кој може да го обвини? Тој освои се што треба да се победи во тенисот. Најде мотив секој ден, не е лесно секој ден да дојдете и да се мотивирате… За гренд слемови е во ред, но за мастерсите… Во исто време, тој е перфекционист, а за тоа треба желба, волја, сила. .. Сакаше неговото семејство да биде таму…“, открива Иванишевиќ.
Нагласува дека е задоволен што седнале и разговарале и истакнува дека му било важно да му каже некои работи на тенисерот.
-Седнавме, се смеевме, убаво си разговаравме, важно ми беше да му кажам некои работи, да му кажам како се чувствувам, а тој ми кажа. Поминавме добро и лошо, минавме низ лудило… Не е лесно да се биде Новак Ѓоковиќ – сите те бараат, сакаат нешто, даваат совети… Кога ќе се изгаснат камерите, Новак е – добар човек. Има големо срце, сака да ги внесе сите во него, а тоа не е така лесно. Секогаш бев подготвен да умрам за него, подготвен да се борам со цел свет, не беше лесно во тие моменти (Австралија 2022) да му бидам тренер, не’ гледаа како лепрозни… Убави се сите резултати што ги постигнавме , но јас сум најгорд што бевме тука за него и откако тргнавме во војна против цел свет, успеавме барем малку да му помогнеме да го надмине тоа лудило, посочува Горан.
Хрватскиот стручњак вели дека било привилегија да се работи со Новак.
Извор: kurir.mk
