Новиот претседател на Кошаркарската федерација на Македонија (КФСМ), Томица Главчев, даде коментар на назначувањето на новиот селектор Марјан Илиевски. Тој можеби најдобро ги познава квалитетите на овој стратег, затоа што двајцата соработуваа во времето на гевгелискаБлокотехна,
„Во изминатиот период имавме разговори со повеќе лица и со добар дел од нив од објективни или субјективни причини не успеавме да најдеме заеднички јазик, да ги усогласиме сите нашите и нивните обврски. Така, благодарност до Марјан Илиевски и целиот тим што ја прифатија нашата покана. Тој како тренер го познаваме, горди сме што тој прифати по период на убедувања да влеземе во еден проект наречен решавање на проблемите со нашата А-селекција. Би сакал неколку кратки црти со оваа работа и очекувањата кои самите ние ги имаме. Мора да констатираме дека нашата А-селекција е некаде околу триесеттото место на ФИБА-листата. Времињата пред петнаесетина години кога бевме околу десеттото до дванаесеттото место се минато и ако сакаме да се впуштаме во посериозна анализа ќе забележиме дека од година во година, сакајќи или несакајќи, таа состојба се влошувала. Сакам да бидам реален оптимист, без разлика на приоритетите, дека сите проблеми ќе ги надминеме. Трпението е исправено пред нас, мора очекувањата да се реални. Таа макотрпна обврска пред нас е заедно со Илиевски, целиот тим и поддршка од јавноста, само со нив можеме да мрднеме од она мртвило кое е надвиснато над нас. Среќен сум што размислувањата околу правецот се заеднички. Ќе биде потребно подолго време “, изјави Главчев.
Извор: kurir.mk
