БЕРЛИН (АА) – Германија денес најави дека воведува привремени проверки на границите со Полска и Чешка во обид да го спречи влезот на нерегуларни мигранти, јавува Анадолу.
Министерката за внатрешни работи Ненси Фезер за новинарите изјави дека дала налог за дополнителни полициски мерки на границите на земјата со Полска и Чешка, кои веднаш стапуваат на сила.
„Мора да го запреме суровиот бизнис на шверцерите што ги ставаат во ризик човечките животи. Затоа сега полицијата спроведува дополнителни, флексибилни и целно ориентирани проверки по должината на маршрутите на шверц“, рече Фезер по состанокот на парламентарната комисија.
Министерката истакна дека полицијата ќе ги зајакне мобилните патроли и ќе спроведе проверки на возилата за кои постои сомнение дека превезуваат нерегуларни мигранти.
Германската Влада беше ставена под зголемен притисок да се справи со миграциите затоа што бројот на нерегуларни мигранти што влегуваат во земјата се зголеми во изминатите неколку месеци.
Околу 205.000 мигранти поднеле барање за азил во Германија во периодот од јануари до август оваа година, што е зголемување од 77 отсто во споредба со истиот период минатата година.
