Од 11 до 13 јули Галичник повторно ќе одекнува со зурли, тапани и мијачки ора – започнува традиционалната „Галичка свадба“, манифестација што повеќе од половина век го чува жив културното наследство на Бистра. Главни ликови годинава се младоженците Јован Филипоски, потомок на старо галичко семејство, и Лилјана Михајлоска, кои велат дека учеството им е исполнување на детски сон и завет кон предците.
Организатор е месната заедница „Галичник“, а покровител претседателката Гордана Сиљановска-Давкова, со финансиска поддршка од Министерството за култура и туризам и главниот спонзор „Пивара Скопје“ со брендот СКОПСКО. Организаторите најавуваат специјален сообраќаен режим и апелираат за одговорно однесување, особено во поглед на консумацијата на алкохол и заштитата на природата.
Тродневната програма ќе стартува во петок со монодрама на мијачки дијалект посветена на 150-годишнината од „Тријазичникот“ на Ѓорѓија Пулески, проследена со DJ-забава. Во сабота ќе се изведуваат обичаите „китење и бајрак“, „фрлање пушка“ и свекрвиното оро, а „Танец“ на платото пред чешмата Упија ќе ги одигра „Невестинското“ и „Тешкото“, симболи на печалбарството и непокорот. Вечерта невестата, со факели и зурли, ќе полни вода од трите прочуени чешми – Секуличе, Динговиче и Упија.
Неделата е резервирана за „канење на мртвите“, „бричење на зетот“, „гледање низ прстен“, дарување и венчавање во црквата „Св. Петар и Павле“. Завршниот акт – испраќањето на тапанџиите и зурлаџиите – традиционално го означува крајот на свадбата. Настанот ќе се пренесува во живо на видео-екран во селото и преку социјалните мрежи, овозможувајќи и на оние кои не можат да допатуваат, да ја почувствуваат магијата на најпознатата македонска свадба.
ИЗВОР: racin.mk
