Фудбалскиот свет изминатиот период остана без големи ѕвезди. Синиша Михајловиќ ја загуби битката со леукемијата, а и Пеле не успеа да го победи ракот. Денеска и Џанлука Виали почина во 58-та година од животот
Легендарниот напаѓач на репрезентацијата и на многу клубови од Италија, Џанлука Виали почина утрово во 58-та година од животот. Пред пет години на Виали му бил дијагностициран рак на панкреасот, по што примил хемотерапија и извесно време одлично се справувал со болеста. Виали еднаш успеал да го победи ракот на панкреасот, но болеста пред извесно време се вратила во поагресивна форма.
Легенадрниот италијански фудбалер пред неполн месец ја извести јавноста дека ја напушта репрезентацијата во која беше помошник на Манчини со цел комплетно да се посвети на лечењето.
Кон крајот на годината бил хоспитализиран во Лондон, бидејќи здравствената состојба му се влошила.
Џанлука Виали фудбалската кариера ја започна во Кремонезе, каде играше од 1980 до 1984 година. Од таму замина во Сампдорија од каде во 1992 година се пресели во Јувентус, а четири години подоцна во Челзи.
Со Јувентус во 1996 година ја освои Лигата на шампионите, а исто така двапати беше шампион на Италија, еднаш со Јувентус и еднаш со Сампдорија. Џанлука беше и најдобар стрелец на италијанската Серија А во 1991 година и на Купот на Италија во 1989 година, кога постигна тринаесет гола во тоа натпреварување.
Беше репрезентативец на Италија, а со „азурите“ освои бронзен медал на Светското првенство во 1990 година. Виали беше менаџер на Челзи, а работеше и во стручниот штаб на италијанската репрезентација. Тој беше помошник на Роберто Манчини со кого ја предводеа Италија до европската титула минатата година.
Фудбалскиот свет изминатиот период загуби големи ѕвезди. Синиша Михајловиќ ја загуби битката со леукемијата, а и Пеле не успеа да го победи ракот.
Извор: 360stepeni.mk
