Француска и јапонска компанија се обратиле до Министерството за енергетика со интерес за изградба на хидроцентралите Чебрен и Галиште, објави министерката за енергетика Сања Божиновска. Таа потенцира дека, иако најдобро би било овие проекти да се реализираат како државни, проблем останува финансирањето.
– Секако дека е најдобро да биде државен проект, но буџетот не е во најдобра состојба. Ова е проект од најмалку една милијарда евра, чија реализација би траела од седум до десет години – рече Божиновска.
Хидроцентралите се стратешки важни за Македонија, бидејќи ќе обезбедат над 500 мегавати нова инсталирана моќност, како и две акумулации кои ќе служат за наводнување и вода за пиење. Министерката најави дека во следните два месеца ќе има поконкретни информации за проектот.
Таа посочи дека во тек е и еден голем енергетски инвестициски циклус во вкупна вредност од 5,7 милијарди евра, со прифатени 67 иницијативи – 59 фотоволтаични централи, една гасна централа и 96 складишта за електрична енергија. Батериските системи ќе овозможат складирање на енергија во периоди на вишок и поефикасно тргување со струја.
– Ова не е само список на желби, туку иницијативи од сериозни инвеститори, вклучувајќи проекти на државната ЕСМ – нагласи Божиновска, додавајќи дека реализацијата зависи од низа фактори, како време за документација, транспорт на опрема и финансирање.
Меѓу проектите е и гасна централа во Вардарскиот регион, за која интерес изразила компанијата „Статус енерџи“. Министерката посочи дека се прави акциски план за дистрибутивната гасна мрежа во земјава, но деталите околу нејзината реализација сè уште се разгледуваат.
Сè уште се користат и постари документи за Чебрен и Галиште, со кои се планира јавноправно-приватно партнерство, додаде Божиновска.
