Италијанската премиерка Џорџа Мелони им се заблагодари на карабинерите за нивната работа во приведувањето на „најважниот член на мафијашката криминална група“. „Ова е голема победа за државата“, изјави таа.
Повеќе од 100 добро вооружени припадници на италијанската полиција учествуваа утрово во акцијата во која беше уапсен најбараниот мафијашки бос во земјата – Матео Месина Денаро, кој беше во бегство три децении.
Според италијанските медиуми, Денаро е уапсен пред 10 часот, додека бил на лекарски третман во приватна клиника во главниот град на Сицилија, Палермо.
„Денес, 16 јануари, карабинерите… го уапсија бегалецот Матео Месина Денаро во санитарна установа во Палермо, каде што отишол на терапевтски третман“,
изјави Пасквале Анџелосанто, генералот на националната полиција на карабинерите.
На видеоснимка објавена од италијанските медиуми може да се видат како луѓе стојат на улицата и им аплаудираат на карабинерите додека го спроведуваат Денаро со лисици на рацете.
VIDEO. People clapping and cheering Carabinieri police in the streets of Palermo after the arrest of Italy’s top mafia boss Matteo Messina Denaro after 30 years on the run – @repubblica pic.twitter.com/W6ptsXu7lL
— Antonello Guerrera (@antoguerrera) January 16, 2023
За него се тврди дека е шеф на Коза Ностра.
Тој е осуден во отсуство на доживотна затворска казна за неговата улога во убиството на славните борци против сицилијанската мафија, обвинителите Џовани Фалконе и Паоло Борселино во 1992 година.
Денаро, исто така, се соочува со уште една доживотна казна затвор за вмешаност во бомбашките напади во Фиренца, Рим и Милано во кои загинаа 10 луѓе, што се случија една година подоцна, како и за киднапирањето, мачењето и убиството на 11-годишниот син на припадник на мафијата, кој стана заштитен сведок на обвинителството кое ги водеше случаите против озлогласената организација.
Денаро своевремено се сметаше за кандидат за шеф на шефовите на сицилијанската мафија, по смртта на Бернардо Провенцано во 2016 година и Салваторе Тото Рина, во 2017 година.
Тој, според информациите, го надгледувал рекетирањето, нелегалниот бизнис со одлагањето отпад, перењето пари и трговијата со дрога за моќната Коза Ностра. Денаро наводно бил штитеник на Салваторе Тото Рина, шефот на кланот Корлеоне, кој беше уапсен во 1993 година, по 23 години во бегство.
„Самиот пополнував гробишта“,
неславно тврдеше еднаш Денаро.
Иако Месина Денаро беше во бегство од 1993 година, се сметаше дека тој сè уште им издава наредби на своите подредени од различни тајни локации.
Во текот на децениите, италијанските истражители честопати беа блиску до фаќање на Денаро, познат и по прекарот Дијаболик, преку следење на неговите најблиски соработници. Ова резултираше со апсење на неговата сестра Патриција и неколку други негови соработници во 2013 година. Полицијата, исто така, успеа да осуети вредни бизниси поврзани мафијашкиот бос оставајќи го сè поизолиран.
Како што пишува Би-би-си, поради малиот број фотографии од Денаро, полицијата во потрагата по него морала да се потпира на дигитални реконструкции на неговото лице за да има претстава како неговиот изглед се менувал во текот на години поминати во бегство.
Снимка од неговиот глас беше објавена дури во 2021 година.
Честитки и изрази на почит за работата на полицијата и вооружените сили пристигнуваат од целиот политички спектар во Италија.
Џан Карло Касели, судија и поранешен јавен обвинител, рече дека апсењето на Месина Денаро е „исклучителен… едноставно историски настан“, што може да доведе до значаен развој во тековните истраги за бомбашките напади во 1993 година, во кои загинаа десет луѓе ширум Италија.
Италијанската премиерка Џорџа Мелони им се заблагодари на вооружените сили за нивната работа во приведувањето на „најважниот член на мафијашката криминална група“,
„Ова е голема победа за државата“,
изјави Мелони.
Извор: 360stepeni.mk
