Преку механизмот на Европската Унија за цивилна заштита Романија, Словачка и Полска испраќаат над 200 пожарникари за да помогнат во справувањето со пожарите што и денеска беснеат во Грција
Морничави се сликите од терен на кои се гледа што огнената катастрофа остава зад себе во погодените области, особено во регионот на главниот град Атина
Романија, Словачка и Полска одговориле на грчкото барање преку механизмот на Европската Унија за цивилна заштита за помош во гаснењето на пожарите и во Грција испраќаат над 200 пожарникари.
Портпаролот на противпожарната служба на Грција. Јанис Артопиос, соопшти дека Грција побарала три пешадиски тима и возила, а позитивно одговориле трите земји.
Па така, Романија ќе испрати пешадиски тим со 40 пожарникари и пет цистерни, како и уште десет пожарникари со пет возила, кои утре ќе пристигнат во земјата.
Словачка ќе испрати пешадиски тим со 31 пожарникар со 15 противпожарни возила, а тимот од Полска е најмногуброен, со 149 пожарникари и 49 возила.
Пожарникарите од Полска и Словачка в петок ќе пристигнат во Грција.
Артопиос потсети дека од вчера во Грција се четири авиони од Италија и Франција, исто така преку механизмот на ЕУ.
Во однос на активните пожари во земјата, рече дека се вложуваат максимални напори за огнените јазици да се стават под контрола.
Во пожарот во западниот дел на областа Атика, поширокиот регион на Атина, заедно со копнените сили, интервенираат девет авиони и 11 хеликоптери, од кои два се за координација. Пожарот на Пелопонез, пак, се гаси со три авиони и два хеликоптери.
За шумскиот пожар на Родос, кој се шири од вчера попладне, портпаролот на противпожарната служба рече дека денеска е веќе во центарот на островот, а преку бројот 112 за итни случаи од жителите на три села беше побарано да се евакуираат.
На островот интервенираат 103 пожарникари со три пешадиски тима и 28 возила, три авиони и четири хеликоптери.
Извор: 360stepeni.mk
