Американскиот јавен обвинител Мерик Гарланд го потврди апсењето на младиот припадник на Националната воздухопловна гарда на Масачусетс, наведувајќи дека тоа е извршено „во врска со истрагата за наводно неовластено отстранување, задржување и пренесување на доверливи информации за националната одбрана“
Агенти на американското Федералното истражно биро (ФБИ) го упасија 21-годишниот припадник на Националната воздухопловна гарда на САД, Џек Тешеира, поради поврзаност со протекувањето на доверливите документи на Пентагон, јавија американските медиуми.
Апсењето на Тешеира доѓа по брзата истрага на американските власти за откривање на идентитетот на лицето кое стои зад објавувањето на доверливите документи на платформа на социјалните мрежи популарна кај љубителите на видео-игри, наведува Си-ен-ен.
Американскиот јавен обвинител Мерик Гарланд го потврди апсењето на младиот припадник на Националната гарда на САД, наведувајќи дека тоа е извршено „во врска со истрагата за наводно неовластено отстранување, задржување и пренесување на доверливи информации за националната одбрана”, пренесува Гардијан.
„Тешеира е вработен во Националната гарда на воздухопловните сили на Соединетите држави. Агентите на ФБИ попладнево без инциденти го приведоа Тешеира во притвор. Тој ќе има првично појавување во Окружниот суд на САД во областа Масачусетс“,
додаде тој, заблагодарувајќи им се на ФБИ и на Министерството за правда за нивната „вредна работа на овој случај“.
Пред да се случи апсењето, Тешеира беше идентификуван од весникот „Њујорк тајмс“, кој го поврза со онлајн-групата од која на платформа на социјалните мрежи првично биле објавени тајните документи. Според пишувањето на весникот, станува збор за онлајн-групата Таг Шејкер Централ (Thug Shaker Central) која брои околу 20 до 30 луѓе кои споделуваат интерес кон оружје, расистички содржини и видео-игри. Припадникот на Националната воздухопловна гарда на Масачусетс бил водач на оваа група.
Претходно две лица запознаени со истрагата, како што пренесува Си-ен-ен, изјавија дека ФБИ го намалило бројот на луѓе за кои веруваат дека би можеле да бидат одговорни за протекувањето, спроведувајќи повеќе интервјуа изминатите денови. Според информациите на телевизијата, и покрај големиот број на лица кои имале пристап до документите, истражителите успеале да го смалат списокот на осомничени за можна поврзаност со протекувањето благодарение на форензичката трага што ја оставило лицето кое ги објавило документите.
Американскиот претседател Џо Бајден претходно денеска во Даблин изјави дека во тек е сеопфатна истрага на разузнавачката заедница и Министерството за правда на САД во врска со протекувањето на доверливи документи на Пентагон и дека властите се приближуваат до одговори.
„Во тек е сеопфатна истрага, како што знаете. Разузнавачката заедница и Министерството за правда работат и се приближуваат“,
рече Бајден прашан за коментар за протекувањето на информациите.
Вчера весникот „Вашингтон пост“ објави интервју со еден од членовите на онлајн-групата каде првично се појавија документите.
Во интервјуто тој го опишува лицето кое стои зад протекувањето на документите како млад, харизматичен ентузијаст за оружје на возраст од рани до средни 20 години, кој работи во неименувана воена база.
Најмалку 50, но можеби и повеќе од 100 тајни документи беа објавени на платформата за социјални медиуми Дискорд (Discord), популарна кај љубителите на видео-игри, пишува Би-би-си.
За Пентагон истекувањето на документите е намерно кривично дело
Портпаролот на Пентагон, Патрик Рајдер, денеска за време на брифингот со новинарите рече дека истекувањето на доверливите информации е „намерно, криминално дело“.
Тој додаде дека Пентагон презел мерки да ги прегледа списоците за дистрибуција и да се увери дека поединците кои ги добиваат информациите имаат потреба од пристап до материјалите, пренесува Асошиејтед прес.
Документите кои протекоа на социјалните мрежи сугерираат и детално изнесуваат информации за помошта што САД и НАТО и ја пружаат на Украина во војната со Русија, како и за проценките на американските разузнавачки служби поврзани со земјите сојузнички на САД.
Тајните документи со детали за плановите на САД и НАТО за зајакнување на украинската војска пред планираната офанзива против руските сили, беа обелоденети минатата недела на Твитер и Телеграм, апликација со повеќе од 500 милиони корисници која е широко користена во Русија.
Извор: 360stepeni.mk
