Би-би-си јавува дека само осум од вкупно 19 лица кои биле во салата преживеале. Многу од жртвите се деца, велат очевидци за локалните медиуми, иако тоа допрва треба да биде официјално потврдено. Инцидентот се случил во неделата во градот Чикиха, а утринава од урнатините е извлечена последната жртва
Единаесет лица загинаа откако во неделата во 15 часот по локално време се урна кров на спортска сала во гимназија во североисточна Кина, објавија државните медиуми, пренесе Би-би-си.
Во моментот на несреќата салата ја користел тим млади одбојкарки.
Би-би-си јавува дека само осум од вкупно 19 лица кои биле во салата преживеале. Многу од жртвите се деца, велат очевидци за локалните медиуми, иако тоа допрва треба да биде официјално потврдено.
Во спасувачката акција учествувале речиси 160 пожарникари и 39 противпожарни возила.
Инцидентот се случил во неделата во градот Чикиха, а утринава од урнатините е извлечена последната жртва.
Прелиминарната истрага покажала дека најверојатната причина за несреќата е тоа што за изградбата на покривот на салата бил користен перлит – материјал кој е облик на вулканско стакло, а при обилните дождови вчера материјалот насобрал вода и предизвикал уривање на покривот.
Државната кинеска новинска агенција соопшти дека полицијата го привела одговорното лице на градежната компанија која го правела покривот на салата.
Градежните и индустриски несреќи се вообичаени во Кина поради слабите безбедносни стандарди.
Извор: 360stepeni.mk
