(ФОТО) Полицијата ги објави првите фотографии од напаѓачот кој уби 10 лица во Лос Анџелес

Мотивите за масовното убиство засега не се познати

Полицијата во Лос Анџелес ги објави првите фотографии од лицето осомничено за вооружениот напад за време на прославата на Лунарната Нова година во паркот Монтереј.

Тој е опишан како лице високо 177,8 сантиметри, облечено во црна јакна и со очила.

Според објавата од властите, полициските инспектори го идентификувале како осомничен и предупредуваат дека лицето треба да се смета за опасно и вооружено.

Медиумите, исто така, јавуваат и дека полицајците во изминатиот околу еден час пронашле и опколиле бело комбе јужно од Лос Анџелес за кое сметаат дека можеби е поврзано со пукањето, но ова засега не е потврдено од властите.

Во нападот беа убиени 10 лица, а уште 10 се ранети од кои некои се во критична состојба.

Мотивите за масовното убиство засега не се познати.

Паркот Монтереј, каде се случи нападот за Лунарната нова година, се наоѓа на околу 11 километри од центарот на Лос Анџелес. Станува збор за подрачје со околу 60 000 население од кое мнозинството е со азиско потекло.