Фон дер Лајен поддржува иранската гарда да се најде на списокот терористички организации

Врските меѓу земјите-членки на Европската Унија (ЕУ) и Техеран се влошија во последниве месеци, откако заглавија напорите за заживување на преговорите за иранската нуклеарна програма, потсетуваат агенциите. Техеран приведе неколку европски граѓани, а Унијата станува сè покритична кон Иран поради насилното задушување на демонстрациите во земјата, како и егзекуциите поврзани со протестите

Претседателката на Европската комисија (ЕК), Урсула фон дер Лајен денеска изјави дека го поддржува ставањето на иранската револуционерна гарда (ИРГЦ) на списокот на терористички организации, со цел да се одговори на „газењето на основните човекови права“ во таа земја. 

Врските меѓу земјите-членки на Европската Унија (ЕУ) и Техеран се влошија во последниве месеци, откако заглавија напорите за заживување на преговорите за иранската нуклеарна програма, потсетуваат агенциите. 

Техеран приведе неколку европски граѓани, а Унијата станува сè покритична кон Иран поради насилното задушување на демонстрациите во земјата, како и егзекуциите поврзани со протестите. 

 „Реакцијата на иранскиот режим е сурова и страшна. Ги гази основните човекови права“,

изјави претседателката на ЕК за новинарите на маргините на Светскиот економски форум во швајцарскиот ски-центар Давос, пренесува Ројтерс. 

ЕУ разговара за четврти круг санкции против Техеран поради  задушувањето на демонстрациите и испораката на оружје на Русија. 

Дипломатски извори наведуваат дека на списокот со санкции следната недела ќе бидат додадени и членови на Корпусот на Исламската револуционерна гарда (ИРГЦ), пишува Ројтерс. 

 „Навистина бараме нова рунда санкции и јас би поддржала и вклучување на револуционерната гарда на таа листа. Слушнав неколку министри кои тоа го бараат и мислам дека се во право“,

изјави Фон дер Лајен. 

 Антивладините демонстрации избувнаа во Иран во септември, минатата година по смртта на Махса Амини, која беше приведена од полицијата за морал поради наводно кршење на правилата за облекување на жените. 

 Иранските лидери ветија остри мерки против демонстрантите, кои ги опишаа како бунтовници, обвинувајќи ги „непријателите“, пред се САД, за „поттикнување немири“. 

 Етикетирањето на ИРГЦ како терористичка група значи дека припадноста на таа група, присуството на нејзини состаноци и носење на нејзиното лого во јавност ЕУ ќе ги третира како кривични дела.