Барселона ја започна сезоната со серијата од 11 победи по ред, а перфектниот низ беше прекинат во Париз, каде каталонскиот гигант загуби од ПСЖ со 4:2 Веднаш по мечот, тренерот на Барселона Ханси Флик ги искажа првите впечатоци од средбата на „Парк на принцови“, потенцирајќи дека неговите фудбалери може многу да научат.
Флик вели дека натпреварот бил одличен, но дека противникот кој е актуелен освојувач на Лигата на шампионите, во моментов е „подобар тим“.
„Тоа беше фантастичен натпревар. На крајот, ПСЖ покажа дека е подобар тим од нас. Го загубивме овој натпревар, но научивме многу од него. Тие поседуваат голем квалитет во транзиција. Се обидовме да се одбраниме, што го правевме добро, но во последните петнаесет минути ни недостасуваше свежина. Тоа не е оправдување. Подготовката за овој натпревар не беше најдобра, но сега мораме да го анализираме. Во иднина мораме да бидеме подобри, иако денес некои работи ги направивме навистина добро“, рече Флик.
Тренерот на Барселона посебно го пофали Чави Еспарт, кој на овој натпревар го постигна својот прв гол во Лигата на шампионите, но не можеше да даде подетални информации за повредата на Дани Олмо.
„Чави Еспарт одигра фантастичен натпревар. Постигна гол, а нивото на кое игра е неверојатно. Ќе видиме што е со Олмо. Доби удар, по што почувствува одредена непријатност. Мораме да почекаме“, рече стратегот на Барселона.
Каталонскиот гигант сега се враќа дома за да започне со подготовките за „Ел Класико“ кое ќе се игра на стадионот „Камп Ноу“ во недела на 25 октомври.
Извор: sportmanija.mk
