Финскиот претседател за влезот во НАТО без Шведска: Ќе беше проблем доколку ја одбиевме Турција

Турскиот претседател Реџеп Таип Ердоган во петокот најави дека неговата влада ќе го започне процесот на ратификација за Финска, но не и за Шведска

Финскиот претседател Саули Нинисто ја бранеше одлуката на неговата земја да влезе во НАТО одвоено од соседна Шведска, тврдејќи дека одбивањето на Турција да ја ратификува кандидатурата на Финска ќе биде проблематично, пишува денеска германската агенцијаДПА.

„Дали требаше да ја отфрлиме турската ратификација? Тоа звучи малку лудо. Да ѝ кажевме ‘не’ на Анкара, тоа ќе беше многу проблематична ситуација“,

рече Нинисто во интервјуто за шведскиот јавен радиодифузер СВТ.

Турскиот претседател Реџеп Таип Ердоган во петокот најави дека неговата влада ќе го започне процесот на ратификација за Финска, но не и за Шведска.

По децениска неутралност, двете скандинавски земји аплицираа за членство во НАТО минатиот мај по руската инвазија на Украина.

Стокхолм и Хелсинки јасно ставија до знаење дека сакаат заедно да влезат во НАТО. Турција продолжува да го блокира приемот на Шведска поради, како што вели, одбивањето на Шведска да екстрадира 120 лица кои Анкара ги смета за терористи.

Унгарија допрва треба да ја ратификува апликацијата на Финска, а одлуката се очекува на 27 март.