ВАРШАВА/СТОКХОЛМ (АА) – Финската полиција соопшти дека нема да биде дозволено јавно палење на светата книга на муслиманите, Куранот, во земјата, пренесува Агенција Анадолија (АА).
Националниот полициски одбор истакна дека палењето на примерок од Куранот ќе го наруши верскиот мир, што е казниво дело во Финска, пренесоа медиумите, цитирајќи ја финската новинска агенција СТТ (STT).
На јавно палење или друго сквернавење на книга што се смета за света од верска заедница ќе биде одговорено со полициска интервенција, нагласија од полицијата.
Како одговор на прашањето на Агенција Анадолија за тоа дали ќе прифатат сличен пристап, шведското Министерство за надворешни работи го повтори својот став за палењето примерок на Куранот во име на слободата на изразување.
„Владата ги разбира оние кои се навредени од дејствија како што е палењето на свети списи“, истакна Министерството, и додаде: „Не сè што е легално е и нужно соодветно.“
Данско-шведскиот политичар Расмус Палудан, лидер на екстремно десничарската партија Страм курс (Цврста линија), во петокот пред џамија во Данска запали примерок од Куранот.
Исламофобичниот чин се случи по неколку дена откако лидерот на екстремната десница запали примерок на Куранот и пред турската Амбасада во Шведска за време на протест одобрен од полицијата.
Палудан најави и дека ќе пали по еден примерок од Куранот секој петок додека Шведска не биде вклучена во НАТО-алијансата.
Извор: www.aa.com.tr
