ЛОНДОН (АА) – Илјадници луѓе се собраа во неделата во главниот град на Финска за да протестираат против расизмот и владината политика во врска со ова прашање, јавуваат локалните медиуми, пренесува Анадолу.
Повеќе од 10.000 демонстранти и членови на над 100 организации, вклучително и групи за човекови права, се собраа на плоштадот на Сенатот во Хелсинки, а подоцна маршираа кон паркот Тулонлахти, соопшти јавната телевизија YLE.
Тие го изразија своето разочарување од политиката на Владата против расизмот, осврнувајќи се на нејзиниот брифинг против расизмот минатата недела.
Демонстрантите ја повикаа Владата да го почитува Уставот на Финска и меѓународните договори што ги потпишала, се вели во веста.
Во четвртокот, партиите на финската коалициска Влада објавија заедничка изјава за искоренување на расизмот и промовирање еднаквост во финското општество.
Тоа се случи по серијата расистички скандали во кои беа инволвирани министри од новата влада и доведоа до назначување работна група задолжена да предложи конкретни мерки за справување со расизмот и дискриминацијата.
Во јуни, четирипартиската влада, вклучително и антиимиграциската Финска партија, ја формираа новата влада на Финска, која има 108 места од 200 во Парламентот.
